15 чэрвеня, Магілёў /Кар. БЕЛТА/. Міжнародны фестываль народнай творчасці "Вянок дружбы" пройдзе ў Бабруйску 23-27 чэрвеня. Аб гэтым карэспандэнту БЕЛТА расказаў начальнік аддзела культуры Бабруйскага гарвыканкама Вадзім Шчэрбіч.
"Фестываль уключаны ў План мерапрыемстваў СНД на 2022 год, прысвечаны Году народнай творчасці і культурнай спадчыны, - расказаў Вадзім Шчэрбіч. - "Вянок дружбы" адбудзецца на бабруйскай зямлі ўжо 16-ы раз. Месца яго правядзення выбрана не выпадкова: горад на Бярэзіне славіцца сваёй шматвяковай гісторыяй, багатымі міжэтнічнымі і нацыянальна-культурнымі традыцыямі. У гэтым годзе Бабруйск адзначае сваё 635-годдзе".
Выступленні на фестывалі не маюць конкурснага характару і праходзяць пад дэвізам аднолькавай значнасці і мастацкай каштоўнасці яго ўдзельнікаў, нацыянальных культур і традыцый. Калектывы пазнаёмяцца з народнай культурай іншых краін, прымуць удзел у выставе-прэзентацыі нацыянальнага сувеніра і нацыянальных пачастункаў, а таксама выставе-конкурсе "Вянок як сімвал фестывалю - у падарунак фестывалю". Канцэрты і творчыя сустрэчы пройдуць як у Бабруйску, так і ў іншых рэгіёнах Магілёўскай вобласці.
У праграму мерапрыемства таксама ўвайшлі парад удзельнікаў фестывалю, тэатралізаваныя паказы і масавыя гулянні, святы музыкі, выставы-кірмашы майстроў розных відаў народнага мастацтва, народных промыслаў і рамёстваў, майстар-класы, творчыя лабараторыі, навукова-практычная канферэнцыя па пытаннях развіцця народнай творчасці.
Паводле слоў Вадзіма Шчэрбіча, фестываль садзейнічае адраджэнню, развіццю і папулярызацыі лепшых традыцый і дасягненняў нацыянальнай, сусветнай культуры, далучае да іх шырокія слаі грамадства. Немалаважны дэманстрацыя дасягненняў у галіне народнай творчасці, павышэнне прафесійнага майстэрства ўдзельнікаў, развіццё і ўмацаванне міжнародных культурных сувязей, абмен духоўнымі і культурнымі каштоўнасцямі.
Арганізатарамі Міжнароднага фестывалю народнай творчасці "Вянок дружбы" выступілі Бабруйскі гарадскі і Магілёўскі абласны выканаўчыя камітэты, Міністэрства культуры Беларусі.-0-
