24 лютага, Мінск /Кар. БЕЛТА/. Унікальная выстава арыгіналаў друкаванай графікі Сальвадора Далі з прыватных калекцый адкрыецца 24 лютага ў Палацы мастацтва, паведамілі БЕЛТА ва ўстанове культуры.
На выставе "Графіка Сальвадора Далі" будуць прадстаўлены 7 серый работ мастака, створаных у 1956-1975 гады да твораў "Боская камедыя" Дантэ Аліг'еры, "Дон Кіхот" Сервантэса, "Аліса ў Краіне цудаў" Льюіса Кэрала, "Трохвуголка" Пэдра Антоніа дэ Аларкона, "Майсей і монатэізм" нататкі Зігмунда Фрэйда, "Сны" Франсіска дэ Кеведа.
Наведвальнікаў таксама чакае сюіта з 25 каляровых літаграфій "Даліянскія коні" - гэта фантазіі майстра, якія не адносяцца да якога-небудзь твора.
На выставе будзе прадстаўлена больш за 130 твораў Сальвадора Далі - ксілаграфіі, афорты, літаграфіі і геліягравюры.
Ілюстрацыі для "Боскай камедыі" прызнаны лепшымі са створанага ў кніжнай графіцы. За 55 месяцаў з'явіліся 100 акварэлей, якія затым перавялі на пласціны (3500 спецыяльных драўляных дошак). Далі сам кантраляваў працэс стварэння ксілаграфій.
Для серыі работ да аповесці "Трохвуголка" вырабілі паперу з аўтарскім штампам - сілуэт трохвугольнага галаўнога ўбору. Далі пастаянна эксперыментаваў з камянямі і метадамі нанясення на іх выявы. У час работы над 13 літаграфіямі да "Дон Кіхота" з'явіўся аўтарскі метад нанясення літаграфічнай фарбы на каменне "булетызм" (шар).
Дзяўчынка са скакалкай у руках - цэнтральны вобраз, які звязвае ілюстрацыі Далі да твора "Аліса ў Краіне цудаў" ў адно цэлае. На кожнай гравюры сілуэт гераіні, што адкідае кантрасны цень. Мастак зрабіў малюнак гуашшу да кожнай з 12 частак. Гэтыя выявы ў далейшым сталі асновай 12 экзатычных геліягравюр.
На тэму "Майсей і монатэізм" Далі зрабіў 10 арыгінальных літаграфій з афортам. Глыбокі друк на пласцінах з чыстага золата выгравіраваны майстрам алмазным вастрыём. Гравюры серыі надрукаваны на авечай скуры тыражом 250 экзэмпляраў.
Серыя "Сны" прадстаўлена 6 афортамі сухой іголкай з пашуарам. Жанр "бачання", які развіваўся ў Сярэдневякоўі, з цягас часу набыў сатырычны характар. Франсіска дэ Кеведа па светапоглядзе і мастацкім метадзе належыць да новага перыяду іспанскай культуры, які атрымаў назву Барока і стаў своеасаблівай рэакцыяй на крызіс гуманістычных ідэалаў эпохі Адраджэння.
Выстава будзе працаваць па 3 красавіка.-0-
