19 ліпеня, Мінск /Кар. БЕЛТА/. Амаль сто чалавек прэтэндуюць на ролю вядучых дзіцячага "Еўрабачання-2018", паведамілі БЕЛТА ў прэс-службе Белтэлерадыёкампаніі.
Медыяхолдынг завяршыў прыём заявак для ўдзелу ў кастынгу вядучых міжнароднага дзіцячага форуму. Сярод прэтэндэнтаў - дарослыя і дзеці ад 9 да 14 гадоў. Ёсць у іх ліку беларускія ўдзельнікі міжнароднага дзіцячага форуму розных гадоў: Ксенія Сітнік (2005 год), Надзея Місякова (2014 год), Руслан Асланаў (2015 год), Хелена Мерааі (2017 год). Свае анкеты таксама прыслалі вядучая дзіцячага "Еўрабачання-2010" Лейла Ісмаілава і фіналісты нацыянальных адборачных тураў дарослага "Еўрабачання" Анжаліка Пушнова (2017 год) і Алег Шчуцкі (2018 год). "Жывы кастынг прэтэндэнтаў Белтэлерадыёкампанія разам з шоу-дырэктарам дзіцячага "Еўрабачання-2018" Горданам Банела плануе правесці ў жніўні", - расказалі ў прэс-службе.
Да прэтэндэнтаў на ролю вядучых дзіцячага "Еўрабачання-2018" выстаўляліся строгія і дакладныя патрабаванні: валоданне англійскай мовай, уменне трымацца на сцэне, працаваць у кадры і цудоўна імправізаваць, а таксама мець за плячыма вопыт работы ў прамым эфіры і ўдзел у вялікіх тэлевізійных праектах.
Міжнародны дзіцячы конкурс песні "Еўрабачанне-2018" пройдзе 25 лістапада ў культурна-спартыўным комплексе "Мінск-Арэна". Арганізатарам і каардынатарам усіх мерапрыемстваў форуму выступае Белтэлерадыёкампанія як адзіны ў краіне член Еўрапейскага вяшчальнага саюза (ЕВС).-0-
