17 лістапада, Мінск /Кар. БЕЛТА/. Фестываль "Лiстапад" стаў рабочай пляцоўкай не толькі для дэманстрацыі фільмаў, але і для падпісання дагавораў і пагадненняў аб супрацоўніцтве. Аб гэтым журналістам заявіў генеральны дырэктар "Беларусьфільма" Юрый Аляксей, перадае карэспандэнт БЕЛТА.
"Фестываль "Лістапад" стаў рабочай пляцоўкай не толькі для дэманстрацыі фільмаў, конкурсных адбораў і гэтак далей, але гэта рабочая пляцоўка для падпісання дагавораў і пагадненняў аб далейшым супрацоўніцтве. Мы прапрацавалі сёння з Расіяй. Старшыня журы Ігар Угольнікаў едзе да нас. Плануем падпісаць з ім пагадненне аб сумеснай вытворчасці мастацкага фільма "Бацька Мінай". Сёння ў нас у рабоце знаходзіцца і прымае ўдзел кітайская дэлегацыя. Гэта важны вектар напрамку. Нашы госці, нашы сябры таксама прыехалі з прапановай аб сумеснай вытворчасці фільма. Фільм будзе ігравы, вядома ж, тэма - дружба Беларусі з Кітаем", - сказаў Юрый Аляксей.
Паводле яго слоў, фестываль прадэманструе новы напрамак - кіно маладых. "Гэты напрамак вярнуўся. Мы будзем паказваць сёння наш фільм. Гэта дэбют маладога чалавека, нашага кінарэжысёра. Таксама гэта будзе мой дэбют як генеральнага дырэктара. Я працую тры месяцы, прыехаў працаваць, калі фільм ужо ўвайшоў у здымачны перыяд. Таму чакаем і падтрымку, і крытыку", - адзначыў ён.
XXIX Мінскі міжнародны кінафестываль (ММКФ) "Лістапад" пройдзе з 17 па 24 лістапада пад слоганам "Ствараем будучыню". У бягучым годзе на фестываль было пададзена 2087 заявак з 107 краін.-0-
