14 верасня, Гомель /Кар. БЕЛТА/. Выстава жывапісу Віктара Барабанцава "Адчуй Радзіму ў сваёй душы" адкрыецца 15 верасня ў Гомелі ў цэнтральнай частцы палаца Румянцавых і Паскевічаў, паведамілі карэспандэнту БЕЛТА ў Гомельскім палацава-паркавым ансамблі.
Падзея прымеркавана да 75-годдзя з дня нараджэння аўтара.
Выстава азнаёміць амаль з 40 творамі майстра. "Віктар Кірылавіч вядомы сваімі надзвычайнымі дэталізаванымі пейзажамі, у якіх раскрываецца глыбокая любоў да Радзімы і цікавасць да яе гістарычнага мінулага. Як ён сам кажа: "Хачу перадаць праз карціны сваю любоў да жыцця і да Радзімы", - працытавалі мастака арганізатары.
Вялікае месца ў творчасці жывапісца займае лірычны пейзаж, у якім нярэдка можна ўбачыць знаёмыя мясціны Беларусі, вядомыя архітэктурныя помнікі, людзей. Перажыванні, звязаныя з чарнобыльскай катастрофай, пакладзены ў аснову цэлай серыі работ аўтара.
У палацы звярнулі ўвагу, што мастак з'яўляецца яркім прадстаўніком беларускай рэалістычнай школы жывапісу. Майстэрству ён вучыўся ў народных мастакоў Беларусі Гаўрылы Вашчанкі і Уладзіміра Стэльмашонка.
Працуе аўтар у станковым і манументальна-дэкаратыўным жывапісе. Прымае ўдзел у роспісе беларускіх храмаў, выконваючы сюжэты ў тэхніцы мазаікі.
Віктар Барабанцаў нарадзіўся ў жніўні 1947 года ў Гомелі. Скончыў Мінскае мастацкае вучылішча, Беларускі дзяржаўны тэатральна-мастацкі інстытут (цяпер - Беларуская дзяржаўная акадэмія мастацтваў). З 1983 года знаходзіцца ў Беларускім саюзе мастакоў, актыўна ўдзельнічае ў выставачнай дзейнасці. Творы Віктара Барабанцава захоўваюцца ў Нацыянальным мастацкім музеі Беларусі, Нацыянальным гістарычным музеі, Дзяржаўным музеі гісторыі беларускай літаратуры, Гомельскім палацава-паркавым ансамблі, Нацыянальным цэнтры сучасных мастацтваў, іншых музеях. Нямала работ жывапісца знаходзіцца і за межамі Беларусі: у прыватных калекцыях Англіі, Бельгіі, Кіпра, Польшчы, Швецыі, Галандыі, ЗША.
Выстава "Адчуй Радзіму ў сваёй душы" прадоўжыцца ў гомельскім палацы да лістапада.-0-
