ДЗЯРЖОРГАНЫДЗЯРЖОРГАНЫ
Флаг Аўторак, 7 лютага 2023
Мінск -3°C
Усе навіны
Усе навіны
Каментарыі
23 студзеня 2023, 16:53
Міхаіл Мясніковіч

Як ЕЭК рэалізуе ініцыятыву Прэзідэнта Беларусі па ўмацаванні супрацоўніцтва з ШАС і БРІКС

Міхаіл Мясніковіч
Міхаіл Мясніковіч
Старшыня Калегіі Еўразійскай эканамічнай камісіі

Беларусь сумесна з Расіяй вядзе актыўную работу з новымі палітычнымі і эканамічнымі цэнтрамі, такімі як ШАС і БРІКС. На праведзеным 9 снежня 2022 года Вышэйшым Еўразійскім эканамічным савеце Прэзідэнт Беларусі Аляксандр Лукашэнка выказаўся за ўмацаванне супрацоўніцтва ЕАЭС з гэтымі аб'яднаннямі. Як бачыць такую работу Еўразійская эканамічная камісія, карэспандэнту БЕЛТА расказаў старшыня Калегіі ЕЭК Міхаіл Мясніковіч.

"Міжнародная дзейнасць Еўразійскага эканамічнага саюза ў новых рэаліях накіравана на стварэнне максімальна выгадных умоў эканамічнага развіцця дзяржаў - членаў ЕАЭС. У сувязі з гэтым супрацоўніцтва з краінамі ШАС і БРІКС, якія ўжо сёння складаюць больш за 30 працэнтаў сусветнай эканомікі, з'яўляецца адным з ключавых прыярытэтаў. Пасля завяршэння снежаньскага пасяджэння Вышэйшага савета мы ў ЕЭК разгарнулі практычную прапрацоўку ініцыятывы Прэзідэнта Беларусі Аляксандра Лукашэнкі аб актывізацыі супрацоўніцтва краін - членаў ЕАЭС, ШАС і БРІКС і правядзенні адпаведнага саміту", - паведаміў Міхаіл Мясніковіч.

Паводле яго слоў, цяпер вядзецца актыўная работа з ШАС па завяршэнні ўзгаднення плана мерапрыемстваў па рэалізацыі мемарандума аб узаемаразуменні паміж ЕЭК і Сакратарыятам ШАС, падпісанага 17 верасня 2021 года. "Дакумент знаходзіцца ў высокай стадыі гатоўнасці, ужо ўзгоднены ўсімі краінамі ШАС і праходзіць фінальныя працэдуры", - адзначыў старшыня Калегіі ЕЭК.

Пры падрыхтоўцы праекта праграмы Еўразійскага эканамічнага форуму, які намечаны на 24 і 25 мая 2023 года, камісія ініцыявала правядзенне асобнай панэльнай сесіі, прысвечанай супрацоўніцтву ЕАЭС і ШАС. "Да ўдзелу будуць запрошаны прадстаўнікі органаў дзяржаўнай улады, бізнесу, экспертнай супольнасці краін ЕАЭС і ШАС, - сказаў Міхаіл Мясніковіч. - Лічым мэтазгодным удзел у форуме і Паўднёва-Афрыканскай Рэспублікі як старшынствуючай у гэтым годзе ў БРІКС, а таксама Новага банка развіцця БРІКС. Мы ўжо ўстанавілі кантакты з нашымі калегамі з адпаведных краін, а таксама цесна працуем з МЗС Расіі як старшынствуючай у органах ЕАЭС у 2023 годзе".

"Лічым, гэтыя мерапрыемствы дадуць магчымасць надаць дыялогу ЕАЭС, ШАС і БРІКС сістэмны характар і сфарміраваць неабходную аснову для магчымага правядзення саміту нашых аб'яднанняў", - упэўнены кіраўнік Калегіі ЕЭК.

Адказваючы на пытанне, якія напрамкі сумеснай работы ЕАЭС, ШАС і БРІКС найбольш перспектыўныя, Міхаіл Мясніковіч канстатаваў, што ў рабоце з ШАС прыярытэтная ўвага ўдзяляецца транспартна-лагістычным пытанням. "У ходзе Самаркандскага саміту ШАС у верасні 2022 года мы абмяркоўвалі гэта пытанне з генеральным сакратаром ШАС Чжанам Мінам і намецілі пэўны план работы. Па выніках ЕЭК падрыхтавала прапановы аб рэалізацыі мегапраекта, які прадугледжвае бясшвовасць транспартных калідораў у Еўразіі, лічбавізацыю лагістычных працэсаў і стварэнне агульнай сістэмы мытнага транзіту. Гэтыя прапановы цяпер разглядаюцца ў краінах ШАС", - растлумачыў кіраўнік Калегіі ЕЭК.

Што ж датычыцца дыялогу ЕАЭС і БРІКС, то асаблівую актуальнасць, паводле слоў кіраўніка Калегіі ЕЭК, мае аб'яднанне патэнцыялаў плацежных сістэм, выкарыстанне нацыянальных валют ва ўзаемных разліках. "Прапрацоўка адпаведнага пытання ў цяперашні момант праводзіцца ЕЭК у ініцыятыўным парадку", - удакладніў ён.

"Узаемавыгадныя напрамкі супрацоўніцтва ЕАЭС з ШАС і БРІКС - пытанні рэгулявання гандлю, развіцця энергетыкі, кліматычнага парадку дня, садзейнічання тэхналагічнаму развіццю і інавацыям, - прадоўжыў Міхаіл Мясніковіч. - Асаблівай увагі заслугоўвае абмен лепшымі практыкамі ў сферы праектнага фінансавання. У нашых аб'яднаннях функцыянуюць інстытуты развіцця, і трэба падумаць, як можна было б сінхранізаваць іх стваральны патэнцыял".

"Мяркую, што ўсе прадстаўленыя пытанні будуць падрабязна абмеркаваны ў ходзе Еўразійскага эканамічнага форуму ў маі гэтага года, па выніках якога мы прымем адпаведныя рашэнні і падпішам дакументы аб далейшым супрацоўніцтве", - рэзюмаваў старшыня Калегіі ЕЭК.

Эдуард ПІВАВАР,

БЕЛТА.-0-

Топ-навіны
З НАМІ НАЙБОЛЬШ ЦІКАВА
Свежыя навіны Беларусі