28 чэрвеня, Мінск /Кар. БЕЛТА/. Вялікабрытанія будзе заставацца паўнацэнным членам ЕС з усімі вынікаючымі правамі і абавязкамі да завяршэння перагавораў аб Brexit. Аб гэтым заявіла сёння канцлер ФРГ Ангела Меркель, выступаючы ў бундэстагу з урадавай заявай, што датычыцца парадку дня саміту ЕС, паведамляе ТАСС.
Ангела Меркель заявіла, што ЕС даволі моцны, каб справіцца з Brexit і далей развівацца. Разам з тым, паводле слоў канцлера, для Еўрасаюза важна ісці наперад у справе еўрапейскай інтэграцыі і не дапусціць узмацнення цэнтрабежных сіл у ЕС у святле выхаду Вялікабрытаніі з ЕС.
Канцлер Германіі таксама адзначыла, што вынікі Brexit для Вялікабрытаніі і ЕС пакуль немагчыма прагназаваць, такая сітуацыя ўпершыню ўзнікла за апошнія 60 гадоў. Паводле яе слоў, Еўрасаюз па-ранейшаму лічыць Вялікабрытанію важным партнёрам, Лондан таксама сам павінен быць зацікаўлены ў дружалюбных адносінах з ЕС.-0-