15 верасня, Мінск /Кар. БЕЛТА/. Ва ўрадзе РФ абмяркоўваюць прапанову расійскіх анлайн-рэтэйлераў увесці падатак для іх замежных канкурэнтаў, уключаючы AliExpress, Amazon і eBay, па прынцыпе "падатку на Google". Аб гэтым паведамляе газета "Коммерсант" са спасылкай на крыніцу.
Паводле даных газеты, сайты кампаній, якія адмовяцца плаціць падатак, могуць быць заблакіраваны праз Раскамнагляд. Гэта вынікае з паправак у Падатковы кодэкс РФ і закон "Аб інфармацыі", распрацаваных расійскай Асацыяцыяй кампаній інтэрнэт-гандлю (АКІГ). Такія меры могуць вымусіць замежныя гандлёвыя пляцоўкі і іх прадаўцоў пакінуць расійскі рынак.
У АКІГ лічаць, што кампаніі накшталт AliExpress, Amazon і eBay цяпер маюць канкурэнтную перавагу перад нацыянальнымі пастаўшчыкамі ў выглядзе вызвалення ад ПДВ і ўвазных мытных плацяжоў пры рэалізацыі тавараў коштам да €1 тыс. і вагой да 31 кг. Папраўкі прапануюць увесці механізм ПДВ-рэгістрацыі замежных інтэрнэт-магазінаў па аналогіі з так званым падаткам на Google, які ўступіў у сілу 1 студзеня 2017 года. У яго рамках замежныя кампаніі, якія прадаюць электронны кантэнт або софт праз інтэрнэт у Расіі, павінны стаць на ўлік у падатковую службу і плаціць ПДВ 18 працэнтаў нараўне з расійскімі кампаніямі.
Для інтэрнэт-магазінаў, якія прапануюць трансгранічную дастаўку тавараў, падатак прапануецца вылічваць спрошчаным метадам, ён складзе 15,25 працэнта ад канчатковай цаны тавару, удакладняе крыніца газеты. Пры гэтым Федэральная падатковая служба атрымае права накіроўваць электроннай гандлёвай пляцоўцы патрабаванне аб блакіраванні старонкі прадаўца, які не выконвае абавязак па выплаце ПДВ. Калі гэта не дапаможа, падатковая служба звернецца ў суд і Раскамнагляд, які пасля атрымання судовага рашэння аб абмежаванні доступу да старонак-неплацельшчыкаў накіруе аператарам сувязі патрабаванне аб іх блакіраванні. Праект таксама прадугледжвае механізм разблакіроўкі прадаўца на працягу трох дзён пасля выплаты ім ПДВ.
Выканаўчы дырэктар АКІГ Арцём Сакалоў пацвердзіў, што такія дакументы распрацаваны асацыяцыяй. Паводле яго слоў, цяпер яны абмяркоўваюцца ва ўрадзе, дзе ідзе працэс падрыхтоўкі заключэння.
У Мінэканомікі РФ паведамілі, што атрымалі дакументы з прапановамі і прапрацоўваюць сваю пазіцыю. У Мінфіне "чулі аб такіх прапановах" і таксама аналізуюць іх.-0-
