21 чэрвеня, Парыж /БЕЛТА - ТАСС/. Бакі дасягнулі значнага прагрэсу ў пытаннях бяспекі ў Данбасе. Аб гэтым заявіў прэзідэнт Францыі Франсуа Аланд на сумеснай прэс-канферэнцыі з прэзідэнтам Украіны Пятром Парашэнкам у Парыжы.
"У плане бяспекі мы бачым значныя зрухі. Але пакуль не выканана патрабаванне аб змяненні выбарчага заканадаўства, правядзенні выбараў і вызваленні заложнікаў. Поўны пакет мінскіх пагадненняў павінен быць выкананы", - сказаў Франсуа Аланд.
Прэзідэнт Францыі таксама лічыць магчымым паэтапную адмену санкцый супраць РФ па меры выканання мінскіх пагадненняў. "Мы будзем прадаўжаць сачыць за сітуацыяй і, калі "Мінск-2" будзе выкананы, то мы можам прадбачыць паэтапнае зняцце санкцый", - дадаў прэзідэнт Францыі.
Франсуа Аланд таксама заявіў, што саміт "нармандскай чацвёркі" можа адбыцца ў выпадку гатоўнасці Расіі. "Я і (Пётр) Парашэнка, і (Ангела) Меркель гатовы і паведамляем, што калі будзе гатовы (Уладзімір) Пуцін, то мы рыхтуем новую сустрэчу "нармандскага фармату", - сказаў прэзідэнт Францыі.
Між тым прэс-сакратар прэзідэнта РФ Дзмітрый Пяскоў сёння заявіў, што ў Крамлі лічаць, што для новай сустрэчы лідараў "нармандскай чацвёркі" патрэбны прагрэс па рэалізацыі мінскіх пагадненняў з боку Кіева, але пакуль гэтага не відаць. "Патрэбны істотныя зрухі ў плане кампенсацыі ўпушчанага часу, у плане дэманстрацыі гатоўнасці выконваць мінскія дамоўленасці, у першую чаргу з боку Кіева", - заявіў журналістам прэс-сакратар прэзідэнта РФ.
Дзмітрый Пяскоў дадаў, што РФ лічыць "абсалютна нелагічнымі" словы аб увязцы антырасійскіх санкцый з "выкананнем Масквой мінскіх пагадненняў". Пяскоў адзначыў, што і прэзідэнт Расіі, і іншыя ўдзельнікі "нармандскай чацвёркі" пастаянна гатовы да перагавораў, правядзення сустрэч. "Разам з тым, праводзіць сустрэчы толькі дзеля таго, каб паставіць птушачку аб праведзеным мерапрыемстве, няма сэнсу", - дадаў ён. "У гэтым выпадку ніхто не адмаўляецца, але ў той жа час любая сустрэча павінна быць добра падрыхтавана, таму што калі збіраюцца на вышэйшым узроўні, важны і працэс абмену меркаваннямі, і гэтак жа важна рэзультатыўнасць", - падкрэсліў прэс-сакратар расійскага лідара.-0-
