26 мая, Каір /БЕЛТА - ТАСС/. Сігнал аварыйнага радыёмаяка лайнера А320 авіякампаніі EgyptAir злоўлены ў Міжземным моры. Як паведаміў газеце "Аль-Ахрам" кіраўнік егіпецкай следчай камісіі Айман аль-Мукадам, вызначана месцазнаходжанне аварыйнага радыёмаяка (ELT), які ў выпадку сутыкнення самалёта з зямлёй або вадой пачынае перадаваць на спадарожнік дакладныя каардынаты месца катастрофы.
Паводле слоў аль-Мукадама, на аснове сігналаў радыёмаяка ўстаноўлены раён яго знаходжання ў радыусе 5 км. Ён растлумачыў, што самалёт Airbus аснашчаны трыма такімі прыборамі, адзін з якіх устаноўлены ў хваставой частцы. Менавіта яго і шукаюць цяпер, адзначыў кіраўнік камісіі, дадаўшы, што яго знаходжанне дасць магчымасць знайсці новыя абломкі самалёта.
Між тым, як адзначыў аль-Мукадам, бартавыя самапісцы А320 да гэтага часу не знойдзены. "Іх пошукі патрабуюць сур'ёзнага тэхнічнага аснашчэння, паколькі, хутчэй за ўсё, яны знаходзяцца на глыбіні, якая перавышае 3 тыс. м", - растлумачыў ён. Паводле яго слоў, улады Егіпта маюць намер звярнуцца да адной з замежных кампаній, якая спецыялізуецца на глыбакаводных аперацыях. "З-за ўмоў надвор'я і хваль радыус пошукавай аперацыі цяпер пашыраецца", - сказаў ён.
Самалёт А320, які выконваў рэйс MS804 з Парыжа ў Каір, знік з экранаў радараў 19 мая прыкладна за 35 мінут да плануемай пасадкі ў каірскім аэрапорце, ледзь увайшоўшы ў паветраную прастору Егіпта. Пазней абломкі лайнера былі знойдзены ў раёне грэчаскага вострава Карпатас. На борце самалёта знаходзіліся 66 чалавек, у тым ліку 56 пасажыраў з 12 краін, уключаючы 30 егіпцян і 15 грамадзян Францыі.-0-
