29 жніўня, Бішкек /БЕЛТА - ТАСС/. Дзень жалобы аб'яўлены сёння ў Кыргызстане. Прыспушчаны дзяржаўныя сцягі і адменены ўсе забаўляльныя мерапрыемствы. Як паведамілі сёння ў прэс-службе кіраўніка кыргызскай дзяржавы, указ аб аб'яўленні 29 жніўня днём жалобы падпісаў 28 жніўня прэзідэнт краіны Алмазбек Атамбаеў.
У сваім указе прэзідэнт адзначыў, што 27 жніўня 2016 года практычна ў адзін і той жа час адбыліся дзве трагічныя падзеі. 14 грамадзян Кыргызскай Рэспублікі загінулі ў выніку пажару ў горадзе Масква Расійскай Федэрацыі, а дарожна-транспартнае здарэнне на аўтамабільнай дарозе Бішкек-Ош забрала жыцці 9 чалавек.
Прэзідэнт пры гэтым адзначыў, што гэта "цяжкая страта для ўсяго народа" рэспублікі. Атамбаеў таксама рэкамендаваў органам мясцовага самакіравання аказаць неабходную дапамогу і падтрымку сем'ям загінулых і пацярпелым.
Між тым жыхары Масквы, як паведаміла сёння пасольства Кыргызстана ў Расіі, нясуць кветкі да будынка дыпламатычнага прадстаўніцтва і выказваюць спачуванні ў сувязі з гібеллю кыргызскіх грамадзян у час пажару ў друкарні "Друкаваны экспрэс" у расійскай сталіцы.
Як плануецца, сёння ў другой палавіне дня целы загінулых у Маскве грамадзян Кыргызстана будуць спецрэйсам дастаўлены ў паўднёвы абласны цэнтр Ош і Бішкек.-0-
