11 лістапада, Мінск /Кар. БЕЛТА/. Больш за 600 школ і каледжаў будуць закрыты 12 лістапада ў Новым Паўднёвым Уэльсе і Квінслендзе (Аўстралія) з-за лясных пажараў, што бушуюць у дзясятках раёнаў. Аб гэтым паведамляе аўстралійская тэлерадыёкампанія SBS.
Прэм'ер-міністр Новага Паўднёвага Уэльса Глэдзіс Берэджыклян заявіла сёння аб увядзенні на ўсёй тэрыторыі штата надзвычайнага становішча на наступныя сем дзён. Цяпер у Новым Паўднёвым Уэльсе зафіксаваны 64 пажары, у Квінслендзе - 50. У абодвух штатах дзейнічае забарона на распальванне вогнішчаў, жыхары штатаў папярэджаны аб магчымай экстраннай эвакуацыі. Прычым, як падкрэсліваюць мясцовыя ўлады, насельніцтву трэба быць гатовым да самастойнай эвакуацыі, паколькі большая частка пажарных і ратавальнікаў цяпер занята тушэннем агню.
Цяпер у Новым Паўднёвым Уэльсе агнём ахоплена тэрыторыя плошчай каля 970 тыс. га, з-за стыхійнага бедства ў штаце пашкоджаны або цалкам згарэлі 200 дамоў і гаспадарчых пабудоў. Ахвярамі лясных пажараў сталі тры чалавекі. Полымя таксама спустошыла прыродны запаведнік у раёне горада Порт-Макуары, у якім знаходзілася калонія каал колькасцю каля 600 асобін. Паводле даных аўстралійскай арганізацыі "Захаванне каал", у агні загінула каля 350 жывёл.
Чакаецца, што 12 лістапада пажаранебяспечная сітуацыя ў шэрагу раёнаў Аўстраліі пагоршыцца, паколькі сіноптыкі прагназуюць цёплае сухое надвор'е і парывістыя вятры. Высокая рызыка пажараў захоўваецца таксама ў некалькіх раёнах акружанага ляснымі масівамі Сіднея - найбуйнейшага горада Аўстраліі і сталіцы штата Новы Паўднёвы Уэльс.-0-
