21 жніўня, Анкара /БЕЛТА - Агенцтва Анадолу/. Турцыя ініцыіравала судовы разбор у рамках СГА ў сувязі з рашэннем адміністрацыі ЗША аб павышэнні мытных пошлін на турэцкую сталь і алюміній. Аб гэтым гаворыцца ў заяве Мінгандлю Турцыі.
"У сувязі з дадатковымі пошлінамі наша краіна запрасіла ЗША на кансультацыі ў СГА. Такім чынам, ініцыіраваны судовы разбор з-за павышэння ЗША тарыфаў на экспартуемыя Турцыяй сталь і алюміній", - гаворыцца ў заяве.
У ведамстве нагадалі, што Анкара адказала на крок Вашынгтона павышэннем пошлін у памеры $533 млн, павялічыўшы тарыфы на імпарт 22 назваў тавараў з ЗША.
Мінгандлю падкрэсліла, што турэцкі бок прыме ўсе неабходныя меры па абароне правоў нацыянальных вытворцаў на платформе Сусветнай гандлёвай арганізацыі. "Разам з Турцыяй судовыя разборы супраць ЗША ў СГА ініцыіравалі Індыя, КНР, Швейцарыя, Нарвегія, Канада, Расія, Мексіка і Еўрапейскі саюз. У наступны перыяд у супрацоўніцтве з названымі бакамі будуць прадоўжаны намаганні па абароне правоў турэцкіх экспарцёраў", - сказана ў заяве.
Прэзідэнт ЗША Дональд Трамп раней паведаміў на сваёй старонцы ў Twitter аб падваенні тарыфаў на сталь і алюміній адносна Турцыі (50 працэнтаў і 20 працэнтаў адпаведна). Да гэтага ЗША ўвялі пошліны на сталь і алюміній (25 працэнтаў і 10 працэнтаў адпаведна) для шэрага краін, у тым ліку Кітая, Канады, Мексікі і краін ЕС.-0-
