15 студзеня, Мінск /Кар БЕЛТА/. КНДР і Рэспубліка Карэя праводзяць перагаворы аб візіце паўночнакарэйскіх артыстаў на Алімпійскія гульні 2018 года ў Пхёнчхане, паведамляюць інфармагенцтвы.
Бакам трэба будзе вызначыць колькасць дэлегатаў, маршрут іх руху, графік, тэматыку выступленняў і інш.
Якіх менавіта артыстаў КНДР хоча адправіць на Алімпіяду, пакуль невядома. Як паведамляе ТАСС, некаторыя паўднёвакарэйскія СМІ выказалі меркаванне, што гэта можа быць ансамбль "Маранбон". Музычную групу часта называюць новым тварам эстрады КНДР або "паўночнакарэйскімі Spice Girls".
У адносінах паміж Сеулам і Пхеньянам намецілася пацяпленне. Упершыню за два гады бакі правялі ў пагранічным пункце Пханмунджом перагаворы на міністэрскім узроўні. Было вырашана, што КНДР накіруе на Алімпіяду ў Пхёнчхане дэлегацыю, якая ўключае прадстаўнікоў улады.-0-