30 жніўня, Мінск /Кар. БЕЛТА/. Савет Бяспекі ААН рашуча асудзіў ракетныя выпрабаванні КНДР і заклікаў да спынення ядзернай праграмы, паведамляюць інфармагенцтвы.
У прынятай Саветам Бяспекі ААН вечарам 29 жніўня па выніках закрытых кансультацый заяве гаворыцца, што дзейнасць КНДР уяўляе пагрозу не толькі для рэгіёна, але і для ўсіх дзяржаў - членаў ААН. У падагульняючым дакуменце падкрэсліваецца, што СБ ААН рашуча асуджае праведзенае КНДР выпрабаванне ракеты, а таксама серыю пускаў балістычных ракет. У заяве змешчана патрабаванне да КНДР спыніць пускі ракет і выконваць прынятыя раней рэзалюцыі Савета Бяспекі ААН. Таксама адзначаецца, што краіна павінна адмовіцца ад усіх ядзерных узбраенняў і існуючых ядзерных праграм поўнасцю, незваротна і спосабам, які паддаецца праверцы. Акрамя таго, КНДР не павінна праводзіць у будучым ядзерных выпрабаванняў і ажыццяўляць якіх-небудзь правакацый, а таксама павінна адмовіцца ад усёй зброі масавага знішчэння.
"Савет Бяспекі зноў заяўляе пра важнасць захавання міру і стабільнасці на Карэйскім паўвостраве і ў Паўночна-Усходняй Азіі ў цэлым, выказвае імкненне да мірнага, дыпламатычнага і палітычнага вырашэння праблем і вітае намаганні членаў СБ ААН, а таксама іншых дзяржаў садзейнічаць мірнаму і ўсёабдымнаму ўрэгуляванню праз дыялог", - адзначаецца ў дакуменце.
Паўночная Карэя 29 жніўня запусціла ракету ў бок рэгіёна Тахоку ў Японіі. Ракета праляцела над паўночнымі рэгіёнамі Японіі, развалілася на тры часткі і ўпала ў Ціхім акіяне каля берагоў вострава Хакайда. Прэм'ер-міністр Японіі Сіндза Абэ заявіў, што зробіць усё неабходнае для абароны японскіх грамадзян.-0-
