27 верасня, Мінск /Кар. БЕЛТА/. Саудаўская Аравія адкрыла дзверы для замежных турыстаў, уводзячы турыстычныя візы для іншаземцаў з 49 краін, паведамляе агенцтва Reuters.
Візы будуць даступны анлайн прыкладна за $80. Наведаць дзяржаву змогуць і жанчыны без суправаджэння мужчын-сваякоў. Нашэнне абаі, або доўгай традыцыйнай арабскай жаночай сукенкі з рукавамі, не будзе абавязковым для жанчын-турыстаў, але апранацца трэба ў сціплае адзенне, у тым ліку на грамадскіх пляжах.
Доступ у мусульманскія святыя гарады Мекку і Медыну абмежаваны. Пад забаронай па-ранейшаму будзе і алкаголь. Мясцовыя ўлады ўпэўнены, што турысты, якія прыехалі ў Саудаўскую Аравію, змогуць атрымаць асалоду ад іншых рэчаў.
Больш падрабязная інфармацыя аб тым, грамадзяне якіх краін змогуць атрымаць турыстычную візу, з'явіцца пазней.
Да гэтага часу наведваць Саудаўскую Аравію маглі патэнцыяльныя рабочыя, мусульманскія паломнікі і тыя, хто прыязджаў у каралеўства ў дзелавыя камандзіроўкі.-0-
