26 ліпеня, Брусель /БЕЛТА - ТАСС/. Санкцыі ЗША супраць РФ у выпадку іх уступлення ў сілу могуць падарваць рэалізацыю ключавых для энергабяспекі Еўрасаюза праектаў. Аб гэтым гаворыцца ў апублікаванай сёння заяве Еўракамісіі (ЕК) па выніках абмеркавання новага законапраекта аб санкцыях ЗША супраць Расіі, Ірана і КНДР.
"У залежнасці ад прымянення гэтых санкцый яны могуць закрануць праекты транспарціроўкі энергетычных рэсурсаў, уключаючы абслугоўванне і мадэрнізацыю газаправодаў у Расіі. Яны таксама могуць падарваць ключавыя праекты для дыверсіфікацыі крыніц энергіі, уключаючы рэалізацыю праекта будаўніцтва Балтыйскага тэрмінала па звадкаваным прыродным газе", - гаворыцца ў заяве.
Там адзначана, што Еўракамісія гатова ажыццявіць канкрэтныя дзеянні для абароны еўрапейскіх інтарэсаў, калі яны будуць закрануты новымі санкцыямі ЗША. Аб якіх мерах ідзе размова, не ўдакладняецца.
У сваю чаргу прадстаўнік МЗС ФРГ Марцін Шэфер сёння на брыфінгу ў Берліне заявіў, што ЕС удалося пераканаць ЗША ўнесці шэраг важных змяненняў у законапраект аб санкцыях супраць Расіі, але заклапочанасць застаецца. "Аб занепакоенасці гэтым гаворыць не толькі нямецкая прамысловасць. Каля чатырох тыдняў таму выказваў занепакоенасць кіраўнік нямецкага МЗС, а таксама аўстрыйскі канцлер. Яны гаварылі, што санкцыі супраць Расіі не павінны быць інструментам прамысловай палітыкі ЗША", - сказаў Марцін Шэфер.
Прадстаўнік МЗС адзначыў, што ўрад ФРГ, Еўракамісія, Еўрасаюз прыводзілі Вашынгтону свае аргументы. "Тэкст прынятага законапраекта ў параўнанні з тым, што мы бачылі 4-6 месяцаў таму, значна палепшыўся, - дадаў Марцін Шэфер. - Мы дабіліся вялікага прагрэсу, змаглі пераканаць нашых партнёраў у Вашынгтоне, што дзейнічаць трэба сумесна".
Законапраект яшчэ трэба будзе зацвердзіць у Сенаце Кангрэса, пасля чаго ён паступіць на подпіс да прэзідэнта. "Яшчэ рана гаварыць, што ўсё будзе зацверджана ў сённяшнім выглядзе", - заявіў прадстаўнік МЗС ФРГ.
Паводле яго слоў, нельга праводзіць прамысловую палітыку "пад прыкрыццём санкцый", і гэта было сказана нямецкім бокам раней. "Гэта застаецца актуальным, мы будзем і далей даносіць гэта да сваіх партнёраў", - адзначыў ён.
У амерыканскім законапраекце, зацверджаным 25 ліпеня, змешчаны абмежавальныя меры адносна Расіі, прынятыя папярэдняй Адміністрацыяй ЗША на чале з прэзідэнтам Баракам Абамам на падставе яго выканаўчых указаў. Размова ідзе аб санкцыях, уведзеных 6 сакавіка і 18 снежня 2014 года, 1 красавіка 2015 года, 26 ліпеня і 29 снежня 2016 года.
Еўрапейцаў хвалюе ўпамінанне праекта "Паўночны паток - 2". Дакумент патрабуе ад урада ЗША прадаўжаць процідзейнічаць будаўніцтву трубаправода NordStream 2. Сцвярджаецца, што праект мае шкоднае ўздзеянне на энергетычную бяспеку Еўрапейскага саюза, развіццё газавага рынку Цэнтральнай і Усходняй Еўропы і энергетычныя рэформы ва Украіне. Адначасова ў законапраекце гаворыцца, што ўраду ЗША трэба зрабіць прыярытэтам экспарт амерыканскіх энергарэсурсаў у Еўропу, каб ствараць рабочыя месцы ва ўласнай эканоміцы.-0-
