9 студзеня, Мінск /Кар. БЕЛТА/. Паўднёвакарэйская і паўночнакарэйская дэлегацыі могуць разам прайсці на адкрыцці і закрыцці Алімпіяды-2018. Аб гэтым паведаміў журналістам прадстаўнік Міністэрства аб'яднання Рэспублікі Карэя, паведамляе ТАСС.
Ён адзначыў, што КНДР прапанавала накіраваць на зімовыя Алімпійскія гульні ў Пхёнчхане сваіх высокапастаўленых прадстаўнікоў, дэманстрацыйную каманду тхэквандо, а таксама дзеячаў выканальніцкага майстэрства. Пры гэтым не ўдакладняецца, ці мае намер КНДР накіраваць сваіх спартсменаў для ўдзелу ў Алімпіядзе.
Паўднёвакарэйскі бок, са свайго боку, прапанаваў дэлегацыям дзвюх краін разам прайсці ў час цырымоній адкрыцця і закрыцця Гульняў.
Рэспубліка Карэя таксама прапанавала КНДР правесці перагаворы паміж прадстаўнікамі ўзброеных сіл дзвюх краін. Гэты крок павінен садзейнічаць зніжэнню ўзроўню напружанасці на Карэйскім паўвостраве, адзначыў прадстаўнік Міністэрства аб'яднання, не паведаміўшы аб рэакцыі паўночнакарэйскага боку.
Акрамя таго, Рэспубліка Карэя прапанавала КНДР правесці сустрэчу сем'яў, раздзеленых вайной 1950-1953 гадоў, на месячны Новы год, які будзе адзначацца 16 лютага.
Першы раўнд дыялогу па нармалізацыі адносін паміж Рэспублікай Карэя і КНДР адбыўся сёння раніцай у прыгранічным пункце Пханмунджом. Галоўнай тэмай першых са снежня 2015 года міжкарэйскіх перагавораў былі заяўлены практычныя крокі па паляпшэнні адносін Сеула і Пхеньяна.-0-
