25 студзеня, Мінск /Кар. БЕЛТА/. У сталіцы Францыі з-за праліўных дажджоў з берагоў выйшла рака Сена, на некаторых вуліцах горада можна ўбачыць, як людзі перамяшчаюцца на лодках, паведамляюць інфармагенцтвы.
Узровень вады ў Сене перасягнуў ужо адзнаку 5 м. Чакаецца, што ў бліжэйшыя дні сітуацыя пагоршыцца, узровень вады падымецца да 6,2 м.
Цяпер у горадзе часткова абмежаваны рух наземнага транспарту, з перабоямі працуе метро.
Улады ўжо аб'явілі ў горадзе жоўты ўзровень трывогі. Жыхароў просяць захоўваць меры засцярогі, а таксама не пакідаць у падвалах каштоўныя рэчы.
Ёсць апасенне, што ў выніку паводкі могуць быць затоплены і падвалы Луўра. Адміністрацыя музея ў якасці прэвентыўнай меры распарадзілася закрыць для наведвання некаторыя залы.-0-
