23 сакавіка, Мінск /Кар. БЕЛТА/. Кандыдатура Жордзі Туруля, дэпутата ад партыі "Разам за Каталонію" і аднаго з саратнікаў экс-кіраўніка аўтаноміі Карлеса Пучдэмона, не прайшла ў час першага галасавання ў каталонскім парламенце. Аб гэтым паведамляе Euronews.
Для зацвярджэння Жордзі Туруля новым кіраўніком урада Каталоніі трэба было мінімум 68 галасоў са 135. У выніку яму не хапіла чатырох галасоў: у падтрымку Туруля выказаліся 64 дэпутаты, гэта прыхільнікі партый "Разам за Каталонію" і "Левыя рэспубліканцы Каталоніі".
Другі тур галасавання павінен адбыцца 24 сакавіка, Жордзі Турулю для зацвярджэння будзе дастаткова падтрымкі большасці. Аднак цяпер Туруль і пяцёра яго саратнікаў выкліканы ў Вярхоўны суд Іспаніі. Туруль лічыцца сярод тых, каго пракуратура Іспаніі абвінавачвае ў бунце, мецяжы і растраце. Цяпер ён знаходзіцца на волі. Як адзначаюць наглядальнікі, калі суд вырашыць заключыць дэпутата пад варту на час разглядаў, ён не зможа з'явіцца ў парламент на другія дэбаты па яго кандыдатуры на пасаду лідара аўтаноміі.
Першапачаткова на пасаду кіраўніка Каталоніі была прапанавана кандыдатура Карлеса Пучдэмона. На тэрыторыі Іспаніі дзейнічае ордэр на арышт палітыка, якога пракуратура таксама абвінавачвае ў бунце, мецяжы і растраце пасля спроб дабіцца незалежнасці Каталоніі. Пазней Пучдэмон прапанаваў, каб на пасаду каталонскага лідара была вылучана кандыдатура яго саратніка - дэпутата Жардзі Санчэса. Аднак Санчэс адмовіўся балаціравацца на гэту пасаду, пасля чаго была вылучана кандыдатура Туруля.-0-
