26 жніўня, Мінск /Кар. БЕЛТА/. Новае землетрасенне адбылося ў Італіі 26 жніўня, паведамляюць інфармагенцтвы.
Землетрасенне магнітудай 4,8 адбылося 26 жніўня ў цэнтральнай частцы Італіі, у горадзе Аматрычэ. Менавіта гэты італьянскі горад найбольш пацярпеў ад землетрасення 24 жніўня.
Эпіцэнтр землетрасення знаходзіўся ўсяго за 5 км ад горада, ачаг залягаў на глыбіні 10 км.
Урад Італіі аб'явіў аб увядзенні надзвычайнага становішча ў зонах, пацярпелых ад землетрасення. Для аказання тэрміновай дапамогі ўжо выдзелены першыя 50 млн еўра з фонду ліквідацыі наступстваў надзвычайнай сітуацыі. Паводле апошніх даных, загінулі 250 чалавек, больш за 360 пацярпелі.
Як паведамлялася, падземны штуршок магнітудай 6,0 адбыўся ноччу 24 жніўня, затым - другі штуршок магнітудай 5,4. Землетрасенне, якое закранула вялікую зону Апенінскага хрыбта, адчулі ў многіх буйных італьянскіх гарадах - Перуджы, Рыеці, Норчы. Эпіцэнтр падземных штуршкоў знаходзіўся ў правінцыі Рыеці на глыбіні 4 км.-0-
