27 лістапада, Мінск /Кар. БЕЛТА/. Верагоднай прычынай узрыву на аргенцінскай падводнай лодцы San Juan, якая прапала, магла стаць высокая канцэнтрацыя вадароду. Аб гэтым сказаў напярэдадні прадстаўнік ВМС Аргенціны Энрыке Бальбі, паведамляюць інфармагенцтвы.
"Улічваючы, што нам паведамілі аб узрыве і што на борце не было баявых тарпед, таму яны не маглі стаць прычынай узрыву, можна зрабіць выснову, што ўзрыў быў выкліканы высокай канцэнтрацыяй вадароду. Але мы не ведаем, што да яе прывяло", - сказаў ён на прэс-канферэнцыі ў горадзе Баія-Бланка.
У сваю чаргу міністр абароны краіны Аскар Агуад, які таксама прымаў удзел у прэс-канферэнцыі, заявіў, што ва ўлад рэспублікі няма ніякіх звестак аб тым, што ўзрыў на падлодцы мог адбыцца з-за пападання ў яе тарпеды. Паводле яго слоў, "гэту версію неабходна выключыць".
Што датычыцца лёсу экіпажа, то яго пошук прадаўжаецца. Як адзначыў Энрыке Бальбі, пацвердзіць або абвергнуць якую-небудзь інфармацыю аб стане членаў экіпажа ВМС не могуць.
Экіпаж субмарыны San Juan перастаў выходзіць на сувязь 15 лістапада пры пераходзе з ваенна-марской базы Ушуая ў Мар-дэль-Плата ў Атлантычным акіяне. Паводле даных ВМС краіны, у момант апошняга сеанса радыёсувязі яна знаходзілася за 430 км ад берага ў раёне паўвострава Вальдэс на поўдні краіны. Пошукі падлодкі прадаўжаюцца да гэтага часу.-0-
