7 лютага, Мінск /БЕЛТА - ТАСС - Сіньхуа/. Не менш як 35 тыс. кватэр і прыватных дамоў пазбаўлены водазабеспячэння і яшчэ амаль 200 засталіся без электраэнергіі пасля землетрасення, якое адбылося ў ноч на 7 лютага на ўсходзе кітайскай правінцыі Тайвань.
Адзначаецца, што ўдар стыхіі стаў самым магутным па інтэнсіўнасці афтэршокаў за апошнія 50 гадоў.
Значныя пашкоджанні атрымала 11-павярховая гасцініца Marshal Hotel: тры ніжнія паверхі "склаліся", з-за чаго будынак нахіліўся на 30 градусаў ад вертыкалі і літаральна завіс у гэтым становішчы. Экстранныя службы ачапілі атэль і пры дапамозе спецтэхнікі эвакуіравалі з будынка не менш як 116 чалавек. Такая сітуацыя склалася вакол будынка "Юньмэнь цуйдзі даша" - ніжнія тры паверхі абрушыліся, і збудаванне нахілілася амаль на 45 градусаў. Ратавальнікі ўстанавілі металічныя бэлькі і будаўнічыя краны для таго, каб прадухіліць далейшы крэн і правесці эвакуацыю. Усяго ў бяспечныя раёны эвакуіраваны амаль 400 чалавек.
Мясцовыя ўлады аб'явілі аб адмене 7 лютага заняткаў у навучальных установах. Прыпынена работа ўсіх прадпрыемстваў у зоне бедства. Пашкоджаны два масты і шэраг дарог, рух на некаторых участках скораснай шашы Суаа-Хуалянь прыпынены.
Землетрасенне адбылося каля паўночы па мясцовым часе ля ўсходняга ўзбярэжжа буйнейшага кітайскага вострава і адчувалася ў шэрагу населеных пунктаў, у тым ліку ў адміністрацыйным цэнтры - Тайбэі. Паводле даных Кітайскага сейсмалагічнага цэнтра (мацерыковы Кітай), амплітуда найбольш моцных штуршкоў дасягала 6,5. Эпіцэнтр землетрасення знаходзіўся ў марской акваторыі ля берагавой зоны павета Хуалянь, а ачаг залягаў на глыбіні 10 км. Усяго з паўночы ў гэтым раёне Тайваня было зафіксавана не менш як 104 паўторныя падземныя штуршкі. Як паведаміў інфармацыйны партал "Сіна", магнітуда двух найбольш моцных афтэршокаў склала 5,4, яшчэ аднаго - 5,2.
Згодна з апошняй інфармацыяй, у выніку землетрасення 4 чалавекі загінулі, 225 атрымалі раненні. Лёс 145 жыхароў застаецца невядомы: з імі не ўдаецца наладзіць сувязь і вызначыць іх месцазнаходжанне.-0-
