16 жніўня, Мінск /Кар. БЕЛТА/. Ліпень 2019 года стаў самым гарачым месяцам за ўсю гісторыю метэаназіранняў на планеце. Аб гэтым гаворыцца ў кліматычнай справаздачы, апублікаванай на сайце Нацыянальнага ўпраўлення па даследаванні акіянаў і атмасферы (NOAA).
У справаздачы сцвярджаецца, што беспрэцэдэнтная спёка назіралася ў ліпені на большай частцы планеты - у Паўночнай і Паўднёвай Амерыцы, Азіі, Аўстраліі, Новай Зеландыі, на поўдні Афрыкі, у заходніх рэгіёнах Ціхага, Ідыйскага і Атлантычнага акіянаў.
Тэмпература паверхні сушы і сусветнага акіяна была на 0,95 градуса па Цэльсію вышэйшая за аналагічны сярэдні паказчык за ХХ стагоддзе, роўны 15,8 градуса.
З-за рэкорднай цеплыні таўшчыня арктычнага і антарктычнага марскога лёду зменшылася да гістарычных мінімумаў. Спецыялісты NOAA адзначаюць, што плошча ледзянога покрыва Арктыкі ў ліпені 2019 года стала на 19,8 працэнта меншая за ўсярэдніны паказчык за прамежак з 1981-га па 2010 год. У Антарктыцы плошча лёду зменшылася на 4,3 працэнта ў параўнанні з усярэдніным паказчыкам за аналагічны перыяд.-0-
