17 кастрычніка, Мінск /Кар. БЕЛТА/. Канстытуцыйны суд (КС) Іспаніі прызнаў супярэчным Канстытуцыі закон аб рэферэндуме Каталоніі, які быў адобраны рэгіянальным парламентам 6 верасня. Аб гэтым гаворыцца ў распаўсюджанай 17 верасня пастанове КС, інфармуе ТАСС.
Адзначаецца, што суд "аднагалосна аб'явіў аб неканстытуцыйнасці і адсутнасці юрыдычнай сілы" закона, дзеянне якога было прыпынена 7 верасня. Тады адпаведны іск быў прадстаўлены ўрадам Іспаніі.
Каталонскі парламент адобрыў у пачатку верасня пасля 16-гадзіннага пасяджэння закон аб рэферэндуме аб самавызначэнні, які нібыта ствараў прававую базу для правядзення плебісцыту. У дакуменце гаварылася, што перамога на плебісцыце прыхільнікаў разрыву з Іспаніяй будзе азначаць аб'яўленне незалежнасці парламентам Каталоніі. У выпадку іх правалу будуць праведзены новыя рэгіянальныя выбары ў аўтаномнай вобласці.
Сёння афіцыйны прадстаўнік каталонскага ўрада Жордзі Туруль заявіў, што ўлады рэгіёна не збіраюцца адступаць ад свайго імкнення дабіцца незалежнасці.
1 кастрычніка ў рэгіёне прайшло галасаванне па пытанні аб выхадзе са складу каралеўства. У ім прынялі ўдзел 2,28 млн з 5,31 млн каталонцаў, якія маюць права голасу, пры гэтым 90,18 працэнта ўдзельнікаў плебісцыту выказаліся за незалежнасць. Мадрыд лічыць гэты рэферэндум нелегітымным і адмаўляецца прызнаваць яго вынікі.-0-