25 верасня, Мінск /Кар. БЕЛТА/. Па крайняй меры 34 чалавекі загінулі і 459 пацярпелі ў выніку разбуральнага землетрасення, якое адбылося на граніцы Пакістана і Індыі. Падземныя штуршкі ў шэрагу рэгіёнаў прадаўжаюцца, паведамляе Пакістанская газета The Express Tribune.
Стан 160 параненых ацэньваецца як крытычны, заявілі ўлады пацярпелых пакістанскіх раёнаў. Армія Пакістана пачала рамонтныя работы на разбураных дарогах. "У хуткім часе невялікія транспартныя сродкі змогуць выкарыстоўваць дарогі, што пацярпелі ад землетрасення", - заявілі ў час наведвання найбольш пацярпелай акругі Мірпур прадстаўнікі Нацыянальнай службы па барацьбе са стыхійнымі бедствамі.
У бліжэйшы час у Мірпур будзе дастаўлена 1 тыс. пакетаў харчовай дапамогі, а таксама палаткі для тых, чые дамы пашкоджаны або разбураны.
У Мірпуры перабоі ў электразабеспячэнні, паколькі мясцовая інфраструктура, уключаючы трансфарматары і электрычныя апоры, значна пашкоджана.
Як паведамлялася раней, землетрасенне магнітудай 5,8 адбылося 24 верасня на граніцы Пакістана і Індыі. Эпіцэнтр падземных штуршкоў знаходзіўся за 5 км на поўнач ад пакістанскага Джэлама, ачаг залягаў на глыбіні 10 км. падземныя штуршкі адчуваліся на большай частцы тэрыторыі Пакістана, уключаючы такія буйныя гарады, як Ісламабад, Пешавар, Равалпіндзі і Лахор. Аб падземных штуршках таксама паведамлялі ў некаторых штатах на поўначы Індыі. Аб пацярпелых і разбурэннях не паведамляецца.-0-
