10 студзеня, Шэньян /БЕЛТА - Сіньхуа/. З 1 студзеня 2018 года гарады Шэньян і Далянь кітайскай правінцыі Ляанін увялі 144-гадзінны бязвізавы рэжым адносна грамадзян з 53 краін свету, якія ажыццяўляюць транзіт праз іх авіяцыйныя кантрольна-прапускныя пункты. Аб гэтым паведаміў на брыфінгу правінцыяльнага народнага ўрада намеснік кіраўніка Упраўлення грамадскай бяспекі правінцыі Ляанін Пань Чуньцзі.
Паводле слоў чыноўніка, пасля ўвядзення новага рэжыму пасажыры з 53 краін пры наяўнасці авіябілета ў трэцюю краіну з вылетам у межах 144 гадзін могуць уязджаць і выязджаць праз КПП міжнароднага аэрапорта Таасянь Шэньяна або міжнароднага аэрапорта Чжоўшуйцзы Даляня і знаходзіцца на ўсёй тэрыторыі правінцыі без візы да шасці сутак.
У правінцыі Ляанін 1 студзеня 2014 года быў уведзены 72-гадзінны бязвізавы транзітны рэжым адносна грамадзян часткі краін свету. Замежныя пасажыры, якія прыязджалі ў краіну праз авіяцыйныя КПП гарадоў Шэньян і Далянь з дапамогай гэтага рэжыму, маглі выязджаць з яе толькі праз той прапускны пункт, праз які яны прыехалі. Пры гэтым замежныя грамадзяне, якія карысталіся 72-гадзінным бязвізавым транзітным рэжымам, маглі заставацца толькі ў адміністрацыйных раёнах гарадоў Шэньян і Далянь.
Новаўведзены 144-гадзінны бязвізавы транзітны рэжым дасць магчымасць павялічыць колькасць людзей, якія прыязджаюць у правінцыю ў мэтах правядзення навукова-тэхнічных абменаў, гандлю, турызму, удзелу ў выстаўках і г.д.-0-
