Сцяг Пятніца, 29 сакавіка 2024
Усе навіны
Усе навіны
У свеце
12 лістапада 2019, 10:25

Дым ад лясных пажараў у Аўстраліі відаць з космасу - NASA

12 лістапада, Мінск /Кар. БЕЛТА/. Воблака дыму ад больш як 100 лясных пажараў у аўстралійскіх штатах Новы Паўднёвы Уэльс і Квінсленд відаць з космасу. Гэта можна назіраць на здымку, выпушчаным амерыканскім касмічным агенцтвам NASA, паведамляе CNN.

На апублікаванай NASA фатаграфіі відаць густы дым над Тасманавым морам паміж Аўстраліяй і Новай Зеландыяй. "Моцныя заходнія вятры прыводзяць да распаўсюджвання агню і перамяшчаюць дым на некалькі соцень кіламетраў у мора", - гаворыцца ў заяве агенцтва.

У Новым Паўднёвым Уэльсе і Квінслендзе аб'яўлена надзвычайнае становішча ў сувязі з пажарамі, каля палавіны з якіх выйшлі з-пад кантролю. Улады гэтых двух штатаў папрасілі мясцовае насельніцтва быць гатовымі да экстраннай самастойнай эвакуацыі, паколькі большая частка пажарных цяпер занята тушэннем агню. Агульная плошча ўзгаранняў па стане на 11 лістапада складала амаль 1 млн га.

Міністр па надзвычайных сітуацыях Новага Паўднёвага Уэльса Дэвід Эліят адзначыў, што на гэтым тыдні сітуацыя з пажарамі ў Аўстраліі можа мець катастрафічны характар, паколькі сіноптыкі прагназуюць сухое і цёплае надвор'е з моцнымі парывістымі вятрамі. З-за задымлення ўзровень забруджвання паветра ў некаторых раёнах Сіднея дасягнуў крытычных адзнак. 12 лістапада з-за лясных пажараў па ўсёй краіне закрыты больш як 600 школ. Ахвярамі стыхійнага бедства сталі па меншай меры тры чалавекі і сотні жывёл.-0-

Падпісвайцеся на нас у
Twitter
Топ-навіны
Свежыя навіны Беларусі