20 жніўня, Мінск /Кар. БЕЛТА/. Плошча ляснога пажару на іспанскім востраве Гран-Канарыя перасягнула 10 тыс. га, што, як сцвярджаюць улады, робіць яго самым вялікім пажарам на тэрыторыі краіны ў бягучым годзе, паведамляе агенцтва France-Presse (AFP).
Ужо эвакуіраваны больш за 9 тыс. чалавек. Улады не выключаюць, што ў бліжэйшы час будзе праведзена дадатковая эвакуацыя.
Інфармацыя аб тым, што нехта пацярпеў у выніку разгулу стыхіі, пакуль не паступала.
Пажар пачаўся на востраве 17 жніўня ў раёне населенага пункта Вальесека і распаўсюдзіўся на запаведнік Тамадаба.
У барацьбе са стыхіяй задзейнічаны амаль 1 тыс. чалавек. Работу пажарнікаў ускладняе спёка і моцныя парывы ветру.-0-
