25 кастрычніка, Мінск /Кар. БЕЛТА/. Колькасць загінулых у выніку атакі тэрарыстаў на паліцэйскі каледж каля пакістанскага горада Квета павялічылася да 59 чалавек, раненні атрымалі больш за 160. Як паведамляюць інфармагенцтвы, колькасць загінулых і параненых можа ўзрасці.
Камандуючы пагранічнымі войскамі правінцыі Белуджыстан генерал-маёр Шэр Афган заявіў, што атака была арганізавана баевікамі забароненай суніцкай тэрарыстычнай групоўкі "Лашкар-э-джангві", якая дзейнічае пад эгідай "Руху талібаў Пакістана".
Позна вечарам 24 кастрычніка трое тэрарыстаў, якія былі ўзброены аўтаматамі і мелі пры сабе паясы смяротнікаў, праніклі ў казарму паліцэйскага каледжа праз яго цэнтральныя вароты, папярэдне абясшкодзіўшы вартавых на назіральнай вышцы.
У казарме баевікі адкрылі хаатычны агонь па кадэтах, якія спалі, пасля чаго двое тэрарыстаў падарвалі сябе, што і прывяло да вялікай колькасці ахвяр. Трэці тэрарыст быў застрэлены байцамі падраздзялення хуткага рэагавання пагранічных войскаў.
Аперацыя супраць баевікоў працягвалася тры гадзіны і цяпер завершана.-0-
