6 чэрвеня, Мінск /Кар. БЕЛТА/. ААН у мэтах бяспекі выведзе частку свайго персаналу з Судана, дзе апошнія дні назіраецца абвастрэнне сітуацыі, паведамляе Reuters.
Паводле даных ААН, эвакуацыі падлягаюць толькі грамадзянскія асобы, ваенныя па-ранейшаму будуць заставацца ў краіне.
Сітуацыя ў сталіцы краіны Хартуме застаецца напружанай. 5 чэрвеня дэманстранты блакіравалі вуліцы ў некалькіх раёнах, у горадзе чуліся выстралы. Нязначныя пратэсты ўспыхнулі каля мячэцей, але паведамленняў па сутыкненнях з сіламі бяспекі не паступала.
Большасць магазінаў у Хартуме застаюцца закрытымі. Некалькі авіякампаній адмянілі рэйсы ў суданскую сталіцу, у тым ліку Gulf Air, Flydubai і EgyptAir.
3 чэрвеня сілы бяспекі Судана ажыццявілі штурм лагера дэманстрантаў у Хартуме. Гэтаму рэйду папярэднічалі тыдні спрэчак паміж кіруючым ваенным саветам і апазіцыяй у пытаннях кіравання краінай. Падзеі 3 чэрвеня сталі самай моцнай успышкай насілля пасля таго, як 11 красавіка армія Судана звергнула прэзідэнта Амара аль-Башыра.
Медыкі, звязаныя з апазіцыяй, паведамілі, што колькасць загінулых у выніку інцыдэнту і беспарадкаў склала 108 чалавек. У Міністэрстве аховы здароўя Судана заявілі, што колькасць загінулых не перавышае 46.
Кіраўнік пераходнага ваеннага савета Судана Абдэль Фатах аль-Бурхан паабяцаў правесці расследаванне інцыдэнту. Ён таксама аб'явіў, што сфарміруе часовы ўрад для кіравання краінай, і заклікаў да правядзення ў краіне датэрміновых выбараў на працягу 9 месяцаў. Акрамя таго, было заяўлена, што ваенны савет Судана адмяняе ўсе пагадненні з апазіцыяй. Аднак ужо 5 чэрвеня ў сваім звароце да нацыі Абдэль Фатах аль-Бурхан прапанаваў аднавіць перагаворы з апазіцыйнымі групамі. Пратэстуючыя і апазіцыя адхілілі гэту прапанову.-0-
