7 красавіка, Мінск /Кар. БЕЛТА/. Жаночая зборная Беларусі па хакеі абыграла Канаду ў чвэрцьфінале другога раўнда Сусветнай лігі з лікам 4:3, паведамляе карэспандэнт БЕЛТА.
Пасля кваліфікацыі ў Ванкуверы, у час якой беларускі пацярпелі два паражэнні ад Індыі (0:1) і Уругвая (2:3) у 1/4 фіналу ім давялося вытрымаць няпросты экзамен у сустрэчы з гаспадарамі турніру.
На 20-й хвіліне зборная Беларусі ўступала 0:3. Магчыма, такая значная перавага і паўплывала на далейшыя дзеянні канадак і супакоіла іх. Перад самым перапынкам Вольга Скрыба, завяршыўшы розыгрыш штрафнога-вуглавога, адзін мяч адыграла - 1:3. У пачатку другога тайма Марына Нікіціна скараціла адставанне да мінімуму. Вырашальным для каманды пад кіраўніцтвам галандскага спецыяліста Хермана Круіса сталі розыгрышы стандартнага становішча. У самы цяжкі момант адказнасць узялі на сябе лідары. Юлія Міхейчык вызначылася дакладным кідком на 43-й хвіліне, Рыта Батура ўпэўнена выкарыстала свой шанц пасля чарговага розыгрышу штрафнога-вуглавога - 4:3.
У паўфінале другога раўнда Сусветнай лігі беларускія хакеісткі сустрэнуцца з Індыяй. Матч адбудзецца ў ноч з 8 на 9 красавіка. У другім паўфінале згуляюць Чылі і Уругвай.
Фіналісты другога раўнда Сусветнай лігі атрымаюць права згуляць у паўфінальным этапе, у якім прымуць удзел 12 лепшых зборных сусветнага рэйтынгу. Матчы гэтай стадыі пройдуць у чэрвені-ліпені ў Ёханесбургу і Бруселе.-0-
