4 верасня, Мінск /Кар. БЕЛТА/. Жаночая каманда "Мінск" выйграла Суперкубак Беларусі па хакеі на траве, абыграўшы ў фінале гродзенскі "Рытм" з лікам 3:2, паведамілі карэспандэнту БЕЛТА ў федэрацыі гэтага віду спорту.
Сустрэча адбылася на штучным полі ЦСК "Нёман" і прайшла ў напружанай барацьбе. Ужо на восьмай мінуце лік адкрыла сталічная каманда. Яўгенія Філіповіч удачна рэалізавала штрафны вуглавы, яе поспех замацавала партнёр па камандзе Юлія Юбко - 2:0. У трэцім перыядзе адставанне аднаго з самых тытулаваных клубаў Беларусі скараціла вопытная Юлія Курганская - 1:2. Аднак у хуткім часе Вераніка Урублеўская забіла трэці мяч у вароты гаспадынь поля - 3:1. Канчатковы лік у матчы ўстанавіла ігрок "Рытма" Ганна Удовенка - 2:3.
Розыгрыш Суперкубка краіны ў Гродне папярэднічаў старту нацыянальнага чэмпіянату сезона-2017/2018, ён пачнецца 7-8 верасня. У першым туры "Мінск" прыме баранавіцкі "Тэкстыльшчык-БарДУ". Дзеючы чэмпіён краіны смалявіцкая "Вікторыя" згуляе супраць СДЮШАР ХК "Мінск", а "Рытм" сустрэнецца з "Гроднааблспортам".-0-
