29 ліпеня, Мінск /Кар. БЕЛТА/. Зборная Беларусі па вольнай барацьбе атрымала яшчэ адну ліцэнзію на Алімпіяду ў Рыа. Аб гэтым стала вядома пасля таго, як спецыяльная камісія Міжнародная федэрацыя барацьбы (UWW) адхіліла ад удзелу ў летніх Гульнях расійскага атлета Віктара Лебедзева, паведамляе карэспандэнт БЕЛТА.
Ліцэнзія ў вагавой катэгорыі да 57 кг у вольнай барацьбе была аддадзена камандзе Беларусі. "З барцом, які дакладна паедзе ў Рыа-дэ-Жанэйра ў нашай зборнай, яшчэ не вызначыліся. Асноўных кандыдатаў два: Асадула Лачынаў і Уладзіслаў Андрэеў", - расказаў дырэктар інтэрнэт-партала аб адзінаборствах octagon.by Раман Маркоўскі.
Спецыяльная камісія UWW 28 ліпеня вывучыла вывады даклада незалежнай камісіі Сусветнага антыдопінгавага агенцтва (САДА) і прыняла рашэнне аб допуску 11 расійскіх барцоў і пяці спартсменак у жаночай барацьбе да ўдзелу ў Алімпійскіх гульнях. Віктар Лебедзеў быў адхілены за станоўчы допінг-тэст на юніёрскім чэмпіянаце свету ў 2006 годзе.
Такім чынам, колькасць удзельнікаў XXXI летніх Алімпійскіх гульняў у зборнай Беларусі па вольнай барацьбе складзе тры атлеты. Раней пуцёўкі ў Рыа атрымалі Амаргаджы Магамедаў (86 кг) і Ібрагім Саідаў (125 кг). Медалі ў вольнай барацьбе ў Рыа-дэ-Жанэйра будуць разыграны з 19 па 21 жніўня ў спарткомплексе Arena Carioca 2.-0-