25 ліпеня, Брэст /Кар. БЕЛТА/. Зборная Беларусі па водным пола на міжнародным турніры ў Брэсце заваявала сярэбраныя медалі, паведамляе карэспандэнт БЕЛТА.
Спаборніцтвы прайшлі з 22 па 24 ліпеня ў абласным Палацы водных відаў спорту пад эгідай Еўрапейскай лігі плавання (LEN). За Кубак федэрацыі на працягу трох дзён змагаліся нацыянальныя каманды Беларусі, Казахстана, Украіны і Чэхіі. Яны згулялі паміж сабой па крузе. Гаспадары спаборніцтваў выйгралі ў двух матчах. На завяршальнай стадыі беларусы сустракаліся з казахамі, якія таксама былі мацнейшымі за сапернікаў, і ўступілі ім у вырашальным паядынку з лікам 14:7. Дзякуючы гэтай вікторыі зборная Казахстана стала ўладальнікам дызайнерскага Кубка, выкананага з аргшкла па спецыяльным заказе Беларускай федэрацыі воднага пола. Зборная Беларусі заняла другое месца, украінцы сталі трэцімі.
"Тэхнічны дэлегат і суддзі LEN адзначылі, што турнір прайшоў на вельмі высокім узроўні. Іх уразілі нашы гасціннасць і спартыўная база. Мы папрацавалі на перспектыву і ўскладаем на гэтыя спаборніцтвы вялікія надзеі. Спадзяёмся, што яны стануць традыцыйнымі, і ў Брэст рэгулярна будуць прыязджаць нацыянальныя зборныя па водным пола", - падзяліўся меркаваннем з карэспандэнтам БЕЛТА дырэктар Брэсцкага абласнога цэнтра алімпійскага рэзерву па водных відах спорту Юрый Кучарук.
Міжнародны турнір па водным пола на такім узроўні прайшоў у Беларусі ўпершыню. У дзень яго адкрыцця тэхнічны дэлегат Еўрапейскай лігі плавання Дзеян Перышыч (Сербія), які назіраў за выкананнем рэгламентаў і правіл, адзначыў, што Беларусі цалкам пад сілу ў бліжэйшыя гады прыняць першынство Еўропы сярод юніёраў або моладзі.-0-
