4 верасня, Мінск /Кар. БЕЛТА/. Беларускія спартсмены заваявалі залаты і сярэбраны медалі на маладзёжным чэмпіянаце Еўропы (U-23) па акадэмічным веславанні, які завяршыўся ў польскім горадзе Крушвіца, паведамляе карэспандэнт БЕЛТА.
Першае месца ў двойцы-парнай занялі беларускі Хрысціна Стараселец і Таццяна Клімовіч, якія пераадолелі дыстанцыю за 7 мін 34,72 сек. Другое месца заняў дуэт з Грэцыі - +4,5 сек. Бронзавая ўзнагарода дасталася экіпажу Швейцарыі - +7,04 сек. У бягучым сезоне Хрысціна Стараселец і Таццяна Клімовіч у ліпені таксама перамаглі на маладзёжным чэмпіянаце свету ў балгарскім Плоўдзіве.
Другі медаль у скарбонку каманды прынёс мужчынскі парны квартэт у складзе: Уладзімір Кулік, Яўген Залатой, Арцём Лапуцін, Кірыл Ціханавіч. Беларусы фінішавалі другімі, уступіўшы 3 секунды камандзе Польшчы.-0-