6 снежня, Мінск /Кар. БЕЛТА/. Трэнеры зборнай Беларусі па біятлоне вызначылі склад на другі этап Кубка свету, які з 9 па 11 снежня пройдзе ў славенскай Паклюцы, паведамілі карэспандэнту БЕЛТА ў Беларускай федэрацыі біятлона.
У параўнанні з першым этапам, які адбыўся ў Швецыі, трэнеры ўнеслі змяненні ў склад. Па-за заяўкай засталіся Хрысціна Ільчанка і Юрый Лядаў. У Паклюцы выступіць Ганна Сола, якая не ўдзельнічала ў гонках у Эстэрсундзе ў мінулыя выхадныя.
У склад мужчынскай каманды ўвайшлі Уладзімір Чапелін, Раман Ялётнаў, Максім Варабей, Сяргей Бачарнікаў. У склад жаночай - Надзея Скардзіна, Ірына Крыўко, Надзея Пісарава, Дар'я Юркевіч, Настасся Кінунен, Ганна Сола.
Найбольш высокі рэйтынг у агульным заліку Кубка свету ў мужчынскай камандзе ва Уладзіміра Чапеліна - 26-е месца, у яго актыве 48 ачкоў пасля бронзавага медаля ў Эстэрсундзе ў індывідуальнай гонцы на 20 км. Надзея Скардзіна знаходзіцца ў агульным заліку на 15-м месцы (65 ачкоў), Ірына Крыўко - на 20-й пазіцыі (56 ачкоў), Дар'я Юркевіч займае 24-е месца (48 ачкоў).
Расклад 2-га этапу Кубка свету ў Паклюцы:
9 снежня
Спрынт, мужчыны (13.30);
Спрынт, жанчыны (16.15).
10 снежня
Гонка праследавання, мужчыны (13.45);
Гонка праследавання, жанчыны (16.45).
11 снежня
Эстафета, мужчыны (13.15);
Эстафета, жанчыны (16.30).-0-
