14 ліпеня, Мінск /Кар. БЕЛТА/. Тры мазаўскія экіпажы фінішавалі ў васьмёрцы мацнейшых на сёмым этапе ралі-рэйду "Шаўковы шлях", паведамляе карэспандэнт БЕЛТА.
Гонка была не самай цяжкай для пілотаў і тэхнікі. Траса складалася са скорасных участкаў, якія перыядычна змяняліся ўзгорыстымі адрэзкамі. Многія экіпажы рухаліся даволі хутка і завяршылі заезд з невялікім адставаннем ад лідара - расіяніна Дзмітрыяй Сотнікава.
Беларускія экіпажы фінішавалі практычна адначасова. Шостае месца заняў Аляксей Вішнеўскі, які пераадолеў спецучастак за 69 хвілін і прайграў пераможцу этапу каля 3 хвілін. У агульным заліку беларускі экіпаж застаецца на 11-м месцы з адставаннем 7 гадзін 22 хвіліны.
На сёмым месцы з розніцай 5 секунд ад партнёра па камандзе "МАЗ-СПОРТаўта" завяршыў заезд Аляксандр Васілеўскі. У турнірнай табліцы ён замыкае першую дзясятку. Ад рэзультату лідара гонкі яго аддзяляюць 6 гадзін 50 хвілін.
На восьмай пазіцыі фінішаваў Сяргей Вязовіч. "Спецучастак быў нескладаны, хіба што ў адным месцы была яма, якая аказалася значна больш сур'ёзнай, чым на карце. Нам давялося абганяць усе джыпы, паколькі стартавалі ў ліку апошніх. Адзіная складанасць - пыл, з-за якога бачнасць пагаршалася. У астатнім жа праблем не было ні з тэхнікай, ні з членамі экіпажу", - расказаў лідар каманды "МАЗ-СПОРТаўта".
Восьмы этап ралі-рэйду "Шаўковы шлях" пройдзе па тэрыторыі Кітая. Спецучастак працягласцю 250 км будзе спалучаць скорасныя адрэзкі, якія паступова будуць ускладняцца. Завершыцца гонка 22 ліпеня ў кітайскім горадзе Сіань.-0-