13 чэрвеня, Мінск /Кар. БЕЛТА/. Спартсменка Аліна Талай расказала ў прэс-цэнтры "СБ. Беларусь сегодня", што перад летнім сезонам прыняла рашэнне рыхтавацца самастойна, перадае карэспандэнт БЕЛТА.
Адзін з лідараў зборнай устанавіла 31 мая ў аўстрыйскім Санкт-Пельтэне новы рэкорд Беларусі ў бегу на 100 м з бар'ерамі (12,41 сек), паспяхова выступіла і на апошніх этапах "Брыльянтавай лігі", двойчы трапіўшы ў прызёры. Адказваючы на пытанне карэспандэнта БЕЛТА, як удалося паказаць такія хуткія секунды, спартсменка падкрэсліла, што рыхтавалася самастойна. "Доўгі час (паўтара года) трэніравалася ў ЗША, але істотнага прагрэсу не адчувала. Заняткі з замежнымі спецыялістамі праходзілі быццам нядрэнна, але рэзультатаў сур'ёзных не паказвала. Пасля зімовага чэмпіянату свету ў Бірмінгеме, дзе зноў не ўдалося падняцца на п'едэстал гонару, прыняла рашэнне рыхтавацца самастойна к лету. Цяпер сама пішу планы і аналізую відэа. Не ўтаю, мне дапамагае трэнер нацыянальнай каманды па спрынце Яўгенія Валадзько, але асноўную частку раблю сама. Рэзультаты, як могуць меркаваць балельшчыкі, вельмі радуюць", - адзначыла рэкардсменка краіны.
Аліна Талай плануе выступіць 22 чэрвеня (пачатак у 18.30) на абноўленым стадыёне "Дынама" ў складзе беларускай каманды на матчавай лёгкаатлетычнай сустрэчы з сапернікамі з Украіны, краін Балтыі і Балканскага рэгіёна.
Беларускія атлеты з 15 чэрвеня апрабуюць бегавыя дарожкі і сектары для скачкоў і кіданняў на абноўленым стадыёне "Дынама".-0-
