23 верасня, Мінск /Кар. БЕЛТА/. Расійскія хакеісты згуляюць у паўфінале Кубка свету з канадцамі. На папярэднім этапе падапечныя Алега Знарка занялі другое месца ў групе В, паведамляе карэспандэнт БЕЛТА.
У заключным матчы першай стадыі расіяне былі мацнейшыя за фінскіх хакеістаў - 3:0. Галамі ў праведзенай сустрэчы вызначыліся Уладзімір Тарасенка, Іван Цялегін і Яўген Малкін.
Не выйшлі ў паўфінал розыгрышу ганаровага трафея хакеісты каманд ЗША, Паўночнай Амерыкі, Фінляндыі і Чэхіі.
Паўфіналы Кубка свету, які праводзіцца трэці раз у гісторыі пры актыўным удзеле НХЛ, адбудуцца ў бліжэйшыя два дні. У ноч з 24 на 25 верасня на пляцоўку спартыўнага комплексу "Эйр Канада-цэнтр" выйдуць расіяне і гаспадары турніру, а 25 верасня сустрэнуцца зборныя Еўропы і Швецыі.
Фінальная серыя Кубка свету да дзвюх перамог пачнецца 28 верасня, другая гульня адбудзецца 30 верасня, трэцяя, калі спатрэбіцца, пройдзе ў Таронта 2 кастрычніка.
Кожная з 8 каманд атрымае па $500 тыс. за ўдзел у Кубку свету. Пераможца турніру стане ўладальнікам $1 млн, фіналіст - $500 тыс.-0-
