28 красавіка, Магілёў /Сяргей Кулягін - БЕЛТА/. Павышэнне кваліфікацыі кадраў у спартыўнай галіне патрабуе карэкціроўкі. Аб гэтым заявіў сёння на пашыранай нарадзе па развіцці спартыўнай галіны Магілёўскай вобласці міністр спорту і турызму Беларусі Аляксандр Шамко, перадае карэспандэнт БЕЛТА.
На думку міністра, у саміх спецыялістаў у гэтым пытанні павінна змяніцца свядомасць - яны павінны ставіцца да гэтага не як да фармальнага абавязку, прадугледжанага нейкім дакументам, а пастаянна імкнуцца да самаўдасканалення. "Многія нашы трэнеры затрымаліся ў мінулым, выкарыстоўваючы пры падрыхтоўцы спартыўнага рэзерву ўстарэлыя і неэфектыўныя метады і формы. А гэта ўплывае непасрэдна на канчатковы вынік і дасягненні спартсменаў", - адзначыў Аляксандр Шамко.
"Прымаюцца ўсе меры, каб выправіць гэту сітуацыю. Яскравы прыклад - новы падыход у арганізацыі спаборніцтваў рэспубліканскага ўзроўню, якія павінны стаць своеасаблівымі семінарамі для спартсменаў і трэнераў з мэтай павышэння іх кваліфікацыі і майстэрства", - сказаў міністр.
Як адзначалася на нарадзе, зменіць падыходы ў перападрыхтоўцы кадраў і Інстытут павышэння кваліфікацыі і перападрыхтоўкі кіруючых работнікаў і спецыялістаў фізічнай культуры, спорту і турызму. Будуць больш актыўна прымяняцца новыя сучасныя методыкі і формы, будуць прыцягвацца вядомыя практыкуючыя прафесіяналы, значна павялічыцца набор слухачоў.-0-