1 кастрычніка, Мінск /Кар. БЕЛТА/. Гандбалісты клуба "Мяшкоў Брэст" прайгралі трэці раз запар у новым сезоне Лігі чэмпіёнаў, паведамляе карэспандэнт БЕЛТА.
30 верасня ў матчы 3-га тура папярэдняй групы А брастаўчане прымалі на сваёй арэне венгерскі "Пік" з Сегеда і ўступілі з лікам 25:28. Госці з самага пачатку вырваліся наперад і пайшлі на перапынак з перавагай чатыры мячы - 16:12. У другім тайме гаспадары вельмі стараліся дагнаць сапернікаў, але змаглі толькі крыху скараціць разрыў. Самымі рэзультатыўнымі ў складзе брастаўчан сталі Сташ Скубэ і Уладзімір Ураньеш, якія закінулі па 4 мячы.
У першым паядынку новага сезона чэмпіёны Беларусі пацярпелі паражэнне ад нямецкага "Кіля" - 30:33 (дома), а затым прайгралі паўночнамакедонскаму "Вардару" (Скоп'е) - 27:35 (у гасцях).
29 верасня ў гэтай групе "Вардар" абыграў на сваёй арэне дацкі "Ольбарг" з лікам 30:28, а яшчэ ў адным паядынку пераможца не быў выяўлены - у харвацкай сталіцы "Заграб" і нарвежскі "Эльверум" завяршылі сустрэчу ўнічыю - 27:27. 30 верасня гандбалісты "Манпелье" прымалі гандбалістаў "Кіля". Турнірнае становішча: "Вардар" - 5 (3), "Пік" - 5 (3), "Ольбарг" - 4 (3), "Кіль" - 4 (2), "Эльверум" - 2 (3), "Манпелье" - 1 (2), "Заграб" - 1 (3), "Мяшкоў Брэст" - 0 (3).
У групе В гандбалісты партугальскага "Порту" 30 верасня абыгралі ў румынскай сталіцы бухарэсцкае "Дынама" з мінімальнай перавагай - 27:26. 29 верасня гандбалісты венгерскага "Веспрэма" абыгралі іспанскую "Барселону" з лікам 29:28, перапыніўшы 40-матчавую пераможную серыю каталонскага клуба. Чэмпіёны Украіны гандбалісты запарожскага "Матора" ўступілі на сваёй пляцоўцы польскаму "Кельцы" - 25:26. У складзе гаспадароў 6 мячоў закінуў беларускі легіянер Барыс Пухоўскі, у пераможцаў тройчы вызначыўся беларус Арцём Каралёк. У сталіцы Францыі "Пары Сен-Жэрмен" разышоўся мірам з нямецкім "Фленсбургам" - 27:27. Турнірнае становішча: "Барселона" - 4 ачкі (3 матчы), "Веспрэм" - 4 (3), "Кельцы" - 4 (3), "Порту" - 4 (3), "Пары Сен-Жэрмен" - 3 (3), "Дынама" - 2 (3), "Матор" - 2 (3), "Фленсбург" - 1 (3).
Групавы этап чэмпіёнскай Лігі завершыцца 9 сакавіка 2022 года, пасля чаго па дзве лепшыя каманды груп адразу выйдуць у чвэрцьфінал. Клубы, якія зоймуць 3-6-я месцы, правядуць матчы за выхад у 1/4 фіналу. У мінулым сезоне "Мяшкоў Брэст" упершыню ў гісторыі прабіўся ў чвэрцьфінал, дзе ўступіў гандбалістам "Барселоны", якія затым заваявалі свой дзясяты Кубак еўрапейскіх чэмпіёнаў, перамогшы ў вырашальным паядынку "Ольбарг".-0-
