19 студзеня, Мінск /Кар. БЕЛТА/. На кортах "Мельбурн Парка" прадаўжаюцца баталіі першага ў сезоне турніру серыі "Вялікага шлема" - адкрытага чэмпіянату Аўстраліі па тэнісе, паведамляе карэспандэнт БЕЛТА.
У матчы 1/16 фіналу беларус Максім Мірны і аўстрыец Філіп Освальд сустракаліся з амерыканскімі братамі Бобам і Майкам Браянамі і прайгралі - 7:6 (7:5), 4:6, 4:6.
Беларуска Лідзія Марозава і Леслі Керхаў з Нідэрландаў завяршылі выступленне на гэтай жа стадыі спаборніцтваў у жаночых пар, уступіўшы кітайскім тэнісісткам Се Шувэй і Пэн Шуай у двух сэтах - 4:6, 1:6.
У спаборніцтвах змешаных тандэмаў Пэн Шуай будзе партнёршай Максіма Мірнага. У першым крузе яны згуляюць з яшчэ адным інтэрнацыянальным дуэтам - Андрэа Сесціні Главачкава (Чэхія) / Эдуар Ражэ-Васлен (Францыя).
Адзіная прадстаўніца Беларусі ў адзіночным разрадзе Аляксандра Сасновіч (56-ы нумар сусветнага рэйтынгу) упершыню ў кар'еры выйшла ў трэці раўнд Australian Open і ў паядынку за выхад у 1/8 фіналу будзе сапернічаць з восьмай ракеткай планеты Каралін Гарсія з Францыі.-0-
