26 верасня, Мінск /Кар. БЕЛТА/. Футбалісты лонданскага "Арсенала" перад гасцявой сустрэчай Лігі Еўропы з барысаўскім БАТЭ абыгралі з лікам 2:0 "Вест Бромвіч Альбіён" у матчы чэмпіянату Англіі, паведамляе карэспандэнт БЕЛТА.
У дамашняй сустрэчы 6-га тура "кананіры" мелі вялікую перавагу, рэзультатам якой сталі два галы Аляксандра Ляказета. Французскі форвард "Арсенала" адкрыў лік на 20-й мінуце гульні, а ў сярэдзіне другой палавіны рэалізаваў пенальці. Пасля гэтай перамогі каманда Арсена Венгера набрала 10 ачкоў і ўзнялася на 7-е месца ў турнірнай табліцы прэм'ер-лігі. Яе ўзначальваюць два прадстаўнікі Манчэстэра - "Юнайтэд" і "Сіці", якія набралі па 16 балаў.
Сустрэча другога тура групы Н Лігі Еўропы БАТЭ - "Арсенал" адбудзецца 28 верасня на полі "Барысаў-Арэны" (пачатак у 20.00). У стартавым туры барысаўчане згулялі ўнічыю ў гасцях у бялградскай "Црвены Зоркі" - 1:1, футбалісты "Арсенала" ў сябе дома ўзялі верх над нямецкім "Кёльнам" з лікам 3:1.-0-
