30 мая, Мінск /Кар. БЕЛТА/. Беларускі велагоншчык Канстанцін Сіўцоў, які выступае за прафесійную каманду Dimension Data, заняў дзясятае месца ў генеральнай кваліфікацыі на адной з самых прэстыжных велагонак "Джыра д'Італія", паведамляе карэспандэнт БЕЛТА.
У ходзе гонкі, якая стартавала 6 мая агульнай працягласцю 3 383 км, найбольш высокі рэзультат беларус паказаў на шостым этапе, фінішаваўшы пятым. Пераможцам у агульным заліку стаў італьянец Вінчэнца Нібалі з каманды Astana, які другі раз у кар'еры дабіўся поспеху на "Джыра". Яшчэ адзін беларус Ілья Кашавой з велагрупы Lampre-Merida завяршыў выступленне на 96-м месцы.
Лепшы рэзультат у гэтай шматдзённай гонцы Канстанцін Сіўцоў паказаў у 2011 годзе, калі пасля дыскваліфікацыі пераможцы іспанца Альберта Кантадора перамясціўся з дзясятага на дзявятае месца ў агульным заліку.
"Джыра д'Італія" з'яўляецца адной з трох гонак Гранд-тура (разам з "Тур дэ Франс" і "Вуэльтай") і праводзіцца з 1909 года.-0-