15 студзеня, Мінск /Кар. БЕЛТА/. Каманда "МАЗ-СПОРТаўта" падала пратэст на рашэнне арбітраў аб пакаранні аднаго са сваіх экіпажаў на "Дакары", паведамілі карэспандэнту БЕЛТА ў беларускай камандзе.
Пілот МАЗа Сяргей Вязовіч быў прыцягнуты да адказнасці пасля чацвёртага этапу ралі, у час якога грузавы аўтамабіль пашкодзіў пазадарожнік Toyota. Суддзі прынялі рашэнне прысудзіць штраф у памеры 20 дадатковых мінут, таксама каманда павінна выплаціць 300 еўра кампенсацыі.
Як адзначыў Сяргей Вязовіч, ён быў пакараны вельмі сурова. "Дакрананне было лёгкім, нязначным - праз пяць мінут яны завяліся і паехалі, але крыўду, відаць, затаілі. Пілоты падалі скаргу, што мы нібыта спецыяльна пашкодзілі іх аўтамабіль. Суддзі прысудзілі штраф 20 мінут і 300 еўра. Беларуская каманда падала пратэст. Мы перадалі відэа з камер МАЗа, таму на працягу бліжэйшых дзён, думаю, удасца гэта рашэнне аспрэчыць. Чамусьці цяпер да нас вельмі прадузята паставіліся: мы ж і відэа прадаставілі, у той час як экіпаж Toyota паказаў толькі фатаграфію памятага багажніка. Верым, што ў сітуацыі разбяруцца, а час, які важны ў барацьбе ў генеральнай кваліфікацыі, нам вернуць", - расказаў пілот.
Да гэтага інцыдэнту МАЗ займаў трэцяе месца ў агульным заліку. На гэты момант экіпаж Сяргея Вязовіча размясціўся на чацвёртай пазіцыі.
Беларускія гоншчыкі ўдзельнічаюць у ралі-рэйдзе "Дакар" сёмы раз. Уладальнікам каманды выступае Мінскі аўтазавод, тэхнічным партнёрам - тэлекам-аператар velcom. Асноўная мэта - увайсці ў лік мацнейшых экіпажаў па выніках ралі ў заліку грузавікоў. Марафон у гэтым годзе праходзіць па тэрыторыі трох краін - Перу, Балівіі і Аргенціны. Працягласць толькі скорасных участкаў складае 3,5 тыс. км, прычым большая частка маршруту прыпадае на высакагор'е. Завершыцца гонка 20 студзеня ў аргенцінскай Кордабе.-0-
