7 жніўня, Мінск /Кар. БЕЛТА/. Іван Ціхан і Павел Барэйша кваліфікаваліся ў фінал кідання молата на чэмпіянаце Еўропы па лёгкай атлетыцы ў Берліне, паведамляе карэспандэнт БЕЛТА.
Адзін з лідараў зборнай 42-гадовы Іван Ціхан з дзявятым рэзультатам (74 м 67 см) змог апынуцца ў ліку дванаццаці лепшых. Высокі рэзультат у адборы прадэманстраваў Павел Барэйша, які адправіў молат на 76 м 47 см. Вышэй беларуса ў падагульняючым пратаколе кваліфікацыі толькі венгр Бенчэ Халаш (76 м 81 см) і паляк Павел Файдак (77 м 86 см). Яшчэ адзін прадстаўнік зборнай Беларусі малады Глеб Дудараў не змог трапіць у лік 12 лепшых і заняў 18-е месца сярод 30 удзельнікаў у кваліфікацыі (72 м 19 см).
Розыгрыш медалёў у кіданні молата пройдзе на Алімпійскім стадыёне ў Берліне 7 жніўня ў 19.45 па мінскім часе.
У чэмпіянаце Еўропы па лёгкай атлетыцы, які прадоўжыцца да 12 жніўня, прымуць удзел амаль 1600 спартсменаў з 50 краін. Зборная Беларусі ў Берліне прадстаўлена 38 атлетамі.-0-