24 сакавіка, Мінск /Кар. БЕЛТА/. Беларускі тэнісіст Ілья Івашка не змог выйсці ў фінал турніру ў кітайскім Гуанчжоу (прызавы фонд - $50 тыс.), паведамляе карэспандэнт БЕЛТА.
Сёння ў паўфінальным паядынку Ілья Івашка, які займае 185-е месца ў сусветным рэйтынгу, сустракаўся з італьянцам Томасам Фабіяна (168-ы нумар рэйтынгу АТР) і пры ліку 0:4 у першым сэце не змог прадоўжыць гульню. У чвэрцьфінале Івашка абыграў яшчэ аднаго беларускага тэнісіста Уладзіміра Ігнаціка (147) - 7:6 (11:9), 6:2.
У вырашальным паядынку гэтых спаборніцтваў 25 сакавіка Томас Фабіяна сустрэнецца з яшчэ адным італьянскім тэнісістам Мацеа Барэціні (338).
На прэстыжным турніры катэгорыі "Прэм'ер" у амерыканскім горадзе Маямі (прызавы фонд - $7 млн) беларуска Аляксандра Сасновіч (120) у другім раўндзе згуляе з 11-й ракеткай планеты Ёханай Конта з Вялікабрытаніі. Беларус Максім Мірны і філіпінец Трэт Х'юі ў першым раўндзе мужчынскага парнага разраду будуць сапернічаць з яшчэ адным інтэрнацыянальным тандэмам Джэймі Марэй (Вялікабрытанія) / Бруна Саарэс (Бразілія), пасеяным пад 4-м нумарам.-0-
