10 красавіка, Мінск /Кар. БЕЛТА/. Каманда Прэзідэнта Беларусі восьмы раз перамагла ў Рэспубліканскіх спаборніцтвах па хакеі з шайбай сярод аматараў на прызы Прэзідэнцкага спартыўнага клуба, перадае карэспандэнт БЕЛТА.
У другім фінальным матчы турніру, які праводзіцца дзясяты раз, хакейная дружына кіраўніка дзяржавы на лядовай пляцоўцы "Чыжоўка-Арэны" абыграла каманду Мінскай вобласці з лікам 9:4 (2:1, 3:1, 4:2).
Лік у праведзенай сустрэчы быў адкрыты на пятай мінуце першага перыяду. З перадачы нападаючага каманды Мінскай вобласці Дзмітрыя Дудзіка голам вызначыўся Аляксандр Бабак.Яшчэ да перапынку хакейная каманда кіраўніка дзяржавы змагла ліквідаваць адставанне ў ліку. Аўтарамі закінутых шайбаў сталі Андрэй Міхалёў і Канстанцін Кальцоў. Пасля адпачынку хакейная каманда Прэзідэнта Беларусі ўмацавала сваю перавагу ў ліку. Канстанцін Кальцоў закінуў сваю другую шайбу ў матчы, галявы дубль таксама ў актыве Сцяпана Панамарова. Галы ў камандзе кіраўніка дзяржавы таксама на рахунку Генадзя Савілава, Андрэя Асташэвіча і Паўла Белага.
Лепшымі ігракамі другога фінальнага матчу прызнаны Дзмітрый Дудзік і Канстанцін Кальцоў.
Арганізатары X Рэспубліканскіх спаборніцтваў па хакеі з шайбай сярод аматараў вызначылі лепшых ігракоў турніру: варатар - Сяргей Рагоўскі (Мінская вобл.), абаронца - Аляксей Цітавец (хакейная каманда Прэзідэнта Беларусі), нападаючы - Канстанцін Кальцоў (хакейная каманда Прэзідэнта Беларусі). Лепшым бамбардзірам прызнаны Павел Белы (хакейная каманда Прэзідэнта Беларусі) - 22 ачкі (9 шайбаў і 13 перадач).
У папярэдніх турнірах каманда Прэзідэнта Беларусі перамагала сем разоў (2008, 2010-2012, 2014-2016). Па адным разе трыумфатарамі станавіліся хакеісты Гомельскай (2009) і Мінскай абласцей (2013).
Арганізатарамі турніру з'яўляюцца Прэзідэнцкі спартыўный клуб, Міністэрства спорту і турызму, асацыяцыя "Федэрацыя хакея Рэспублікі Беларусь", Мінгарвыканкам.
Генеральны інфармацыйны партнёр - Нацыянальная дзяржаўная тэлерадыёкампанія Беларусі.-0-