27 ліпеня, Мінск /Кар. БЕЛТА/. Хакеісты мінскага "Дынама" прайгралі маскоўскім аднаклубнікам 3:6 на турніры "Кубак Мінска", прысвечаным 950-годдзю беларускай сталіцы, паведамляе карэспандэнт БЕЛТА.
На лёдзе "Чыжоўка-Арэны" мінчане выйшлі наперад у канцы першага перыяду, калі Яўген Лісавец рэалізаваў колькасную перавагу. Пасля першага перапынку масквічы перахапілі ініцыятыву і чатыры разы паразілі вароты Міхаіла Карнавухава, на што "зубры" адказалі шайбай Роба Клінкхамера. У заключнай трэці матчу мінчане скарацілі разрыў пасля кідка Яўгена Кавыршына. Але Данііл Тарасаў, які аформіў галявы дубль, устанавіў канчатковы рэзультат - 6:3 на карысць расійскай каманды.
У стартавым паядынку гэтага турніру яраслаўскі "Лакаматыў" перамог хакеістаў рыжскага "Дынама" з лікам 3:1.
Сёння пройдуць яшчэ два матчы перадсезоннага турніру - у 15.00 адбудзецца мінскае дэрбі: "Юнацтва" - "Дынама". У 19.00 на лёд выйдуць хакеісты яраслаўскага "Лакаматыва" і "Югры" з Ханты-Мансійска.-0-
